Сэрца краіны ў кожным сімвале

Штогод у другую нядзелю мая Рэспубліка Беларусь адзначае адно з найважнейшых дзяржаўных святаў – Дзень Дзяржаўнага сцяга, Дзяржаўнага герба і Дзяржаўнага гімна. Гэтая дата займае асаблівае месца ў календары, сімвалізуючы пераемнасць пакаленняў, нацыянальную згоду і павагу да галоўных атрыбутаў суверэнітэту краіны.

Дзяржаўныя сімвалы ўвасабляюць шматвяковую гісторыю беларускага народа, яго працоўныя і ратныя подзвігі, культурныя і духоўныя традыцыі. Святочныя мерапрыемствы, якія праходзяць у гэты дзень па ўсёй рэспубліцы, закліканы падкрэсліць адзінства грамадства і нагадаць пра каштоўнасць незалежнасці, якую мы ўсе разам захоўваем і шануем.

10 мая цэнтральнай падзеяй у сталіцы стала маштабная цырымонія ўшанавання дзяржаўных сімвалаў. У мерапрыемстве прынялі ўдзел прадстаўнікі моладзі, ваенна-патрыятычных класаў і клубаў, грамадскіх аб'яднанняў, працоўных калектываў, курсанты і ваеннаслужачыя. Студэнтам і працоўнаму калектыву Беларускага дзяржаўнага ўніверсітэта замежных моў таксама пашчасціла прыняць актыўны ўдзел ва ўрачыстым рытуале ўшанавання дзяржаўных сімвалаў і атрымаць асалоду ад яркай канцэртнай праграмы.

Адным з ключавых момантаў мерапрыемства стала захапляльнае шэсце з Дзяржаўным сцягам вялікіх памераў. Яго даўжыня склала 500 метраў. Пад гукі ўрачыстай музыкі маштабнае палатно было пранесена ўдзельнікамі акцыі ад стэлы «Мінск – горад-герой» да плошчы Дзяржаўнага сцяга.

Акрамя гэтага, тэатру танца «Renaissance Dance» нашага ўніверсітэта выпаў гонар стаць часткай вакальна-харэаграфічнай кампазіцыі пад назвай «Шлях патрыёта. Голас сілы». У сваім выступленні артысты калектыву здолелі перадаць глыбокую павагу да нацыянальных каранёў і энергію сучаснага маладога пакалення.

Удзел у падобных рэспубліканскіх мерапрыемствах з'яўляецца для студэнтаў і выкладчыкаў універсітэта не толькі адказнай задачай, але і важнай часткай грамадзянска-патрыятычнага выхавання, якое фарміруе ў моладзі ўсвядомленае стаўленне да будучыні сваёй краіны.

Святкаванне дня дзяржаўных сімвалаў Рэспублікі Беларусь чарговы раз пацвердзіла: павага да герба, сцяга і гімна з'яўляецца трывалай асновай для кансалідацыі ўсіх, хто жыве і працуе на карысць нашай Радзімы.